Uagut Nuussuarput
Kommuneqarfik Sermersuup tungaaniit innuttaasut Nuussuarmi qanoq atuisarnerinik isiginninnerinillu annertunerusumik paasisaqarusuppoq. Tamanna pillugu kikkulluunniit apeqqutinik akinissamut kommunip tungaaniit kaammattuutigineqarpoq. Apersuiffissami 17-inik akisassartaqarpoq, taakkulu minutsit tallimat qulillu missaanni atorlugit immersorneqarsinnaapput. Neriuppugut peqataarusussasusi.
Anguniagaasoq tassaavoq, Nuussuup najugaqarfigiuminartunngorlugu ineriartortinneqarnissaa. Nuussuup illoqarfiullu sinneranut ataqatigiinneq pitsanngorsarneqassaaq. Taamaattumik sumiiffiup ineriartortinneqarnissaanut suliassaqarfiit assigiinngitsut akornanni suleqatigiinnissaq pinngitsoorneqarsinnaanngilaq. Apeqqutit atorlugit misissuisoqarnerani tunniussaqaqataasinnaavutit illoqarfigisannilu najugaqarfigisanni ineriartortitsinermut sunniuteqaqataasinnaallutit.
Misissuinermi inernerit inissiaqarfiup inuuffigiuminarnerulernissaanut angallavigiuminarnerulernissaanullu iluaqutaajumaarnerat naatsorsuutigaarput.
Suliamik ingerlatsinissat
Nuussuarmi najugalinnut qitiutitsilluni apeqqarissaarneq
Nuussuaq pillugu innuttaasunut akuutitsinermi fase kingullermi Nuussuarmi najugallit apersorneqassapput, taakku siunissami sumiiffimmi ineriartortitsinissamut isummersoqataallutik immersuinissamut periarfissinneqassapput.
Qitiutitsilluni apeqqarissaarneqInnuttaasut illuanni Illorpumi novembarip 16-ianni 2023-mi nal. 17.00 – 19.00 ingerlanneqarumaarpoq.
Apeqqarissaarneqarnissamut nalunaarneq plan@sermersooq.gl -imut nassiunneqassaaq.
