Nuup ilisarnaataa
Suliamik ingerlatsinissat
Ajugaasussatut siunnersuut
Kommuneqarfik Sermersuumit nuannaarutigalugu Nuup Ilisarnaataa pillugu isumassarsiortitsilluni unammisitsinermi Arkitekt, Cand.arch. Bilo Høegh Stigsen suliamik "Sermitsiap Qilaataa" ajugaasuusoq tamanut saqqummiunneqarpoq.
Tamanut taasititsineq maanna naammassisimalerpoq innuttaasullu suliamik ajugaatikkusutaminnik taasinissamut periarfissaqarnikuupput.
Suliaq ajugaassutigineqartoq tassaavoq ilisarnaammik qaqqamik Nuup kinaassusaanut attuumassuteqarluinnartumik - Sermitsiamik eqqumiitsuliornikkut ilusilersuinikkullu sinaakkusiineq. Piffissap ingerlaneranni kalaallit eqqumiitsuliortut anginerit ilaasa isumassarsiffigisimavaat aamma qalipakkani, taallani oqaluttuanilu ersarissumik takuneqarsinnaalluni. Sermitsiap Qilaataanik isikkivik pilersinneqassaaq, tassani innuttaasut tikeraallu naapissinnaapput qaqqamullu isikkivigissuaq kusanartoq misigalugu. Suliaq Sermitsiamut oqaluttuassartaanullu nersorinninneruvoq.
Kommuneqarfik Sermersuumit massakkut eqqumiitsuliortoq isumaqatigiissuteqarfigineqassaaq suliallu piviusunngortinnissaanut ikkussuunnissaanullu suliaq aallartissallugu.