Nuummi pisuinnarnut cykilertunullu aqqutit pitsaanerusut

Angallanneq pillugu immikkoortumut siunnersuut siulleq ”Angallannermut pilersaarut, Imm. 1 – Aqquserngit aqqusineeqqallu, Nuuk” tamanut tusarniutigalugu nassiuteqqammerpoq. Pilersaarummi immikkoortumi siullermi illoqarfimmi pisuinnarnut pissutsit pitsanngorsaavigineqarnissaat siunertarineqarpoq. Aqqutit pitsanngorsaavigineqarnissaat kissaatigivarput, soorlu pisuinnarnut aqqutit cykilertunullu aqqutit pilersinneqarnissaat, illoqarfik isumannaannerulersinniarlugu aamma pisuinnaat cykilertullu ajornannginnerusumik ingerlaarsinnaaqqullugit.

Tassunga atatillugu, maani illoqarfimmi pisuinnarnut - aamma cykilertunut, illit isummat malillugu sumiiffinni aqqutinik pitsaasunik amigaateqarnersoq paaserusupparput - imaluunniit aqqutaareersut pitsanngorsaavigineqarnissaannut isumassarsiaqarnersutit. Assersuutigalugu aqqusineeraq nalunaaqutserneqarsimanngitsoq imaluunniit majuartarfiliiffissaqqissumik maluginiagaqarsimasinnaavutit. Imaassinnaavoq ullut tamaasa qaninnersiortartutit aqqusineeraliorfigineqarsinnaasumik, imaassinnaavorluunniit cykilinut aqqutilerneqarsinnaasumik eqqarsartutit? Illoqarfimmi aqquserngit pitsaanngorsaavigineqarnissaannut imaluunniit pilersinneqarsinnaasut pillugit siunnersuutit tamaasa assorsuaq tusarusuppavut.

Matuma ataani nunamut assitaliunneqartumi nalunaaqutsiisinnaavutit kingornalu "Tusarniaanermi akissutit nassiuguk" toorlugu siunnersuutit allassinnaavat. Sumiiffimmi aqqutaareersumik nalunaaqutsiinerusinnaavoq, tassani arlaannik amigaateqarsorisat, imaluunniit aqqutissatut imaluunniit suli aqqutigineqanngitsunik siunnersuuteqarsinnaavutit. Taamatut iliorsinnaavutit aqqutip aallartinnera imaluunniit naanera nassaaralugu, nunap assitaani sumiiffia toorlugu kingornatigullu ”Tusarniaanermi akissutit nassiuguk" toqqarlugu. Aqqut allaaserissavat aamma tassunga siunnersuutissatit.

Imaassinnaavoq aqqutissamut imaluunniit pitsanngorsaatissatut siunnersuutit nunap assingani siunnersuutigineqareersimasoq, taamaattoqarsimappat taava taanna likersinnaavat oqaaseqarfigaluguluunniit, tassani siunnersuutit nassuiarlugu.

Takussutissatut asseq, aqqusineeraareersut, aqqutissiaareersut majuartarfioreersut pillugit ataani ilanngunneqartoq, isumassarsiorfissartut qimerloorsinnaavat.  

Nuummi pisuinnarnut cykilertunullu aqqutinut isumannaallisaatitut pitsanngorsaatissatullu siunnersuutisi oqaaseqaatisilu tamaasa atuarnissaat assut qilanaaraarput!