Nuuk 2035 – Ataatsimoorluta siunissarput
Nuuk alliartupallappoq, Kommuneqarfik Sermersuullu illoqarfiup innuttaasuminut tamanut pissarsiffiusussamik ineriartortinnissaanik kissaateqarpoq. Taamaammat 2035-p tungaanut tikkuussisussamik nutaamik periusissiorluni aallartippoq.
Illit isummannik ilanngussisinnanngorlutit peqataanissannut kajumissaarneqarputit, taamaalilluni periusissiornermi tunngavissaqarluarnissamik pilersitsisoqarsinaalissammat. Nuummi innuttaasumik ataatsimoortitsisumik peqataatsitsilluni kajumisitsillunilu illoqarfiup takorluugaaneranik ingerlarnissaanillu periusissamik pilersitsitsinissaq anguniarneqarpoq.
Quppernermi uani periusissiornermi suliaq malinnaavigisinnaavat. Tassani atuarsinnaavat qaqugu qanorlu suliamut taaassunga peqataatinneqarsinnaanerlutit. Maajip 7.-aniit juunip 3.-anut ilaatigut Nuuk suli najugaqarfigalugu pitsaanerunissaanut qanoq isumaqarnesutit immersuillutit misissuinermi peqataasinnaavutit
Suliamik ingerlatsinissat
Nuup siunissaa pillugu tusarnaariarit
Illoqarfiit pingaarnersaat pillugu periusissiaq atorlugu, kommune ukiut qulit tulliuttut qanoq ineriartortinneqassanersoq siunnerfigineqassaaq.
Sisamanngorpat Nuummi innuttaasut tamarmik katersortarfimmut qaaqquneqarput. Tassani borgmesteri, kommunalpolitikerit, pisortallu apeqquteqartoqarnissaanut piareersimassallutik.
Nipilersortunik akunniliisoqartassaaq, tamulugassaqarlunilu imigassaqassalluni.
🤝 Borgmesteri, kommunemi politikerit aamma allaffeqarfimmiut naapikkit
👂 Nuup ukiuni qulini tulliuttuni qanoq pilersaaruteqarfigineqarnera paasisaqarfiginerujuk
🎶 Meeqqat nipilersornermik ilinniarfimmeersut erinarsoqatigiit tusarnaakkit
🍽 Tamulugassaqassaaq imeruersaateqarlunilu
🎤 HH Suersaq tusarnaaruk
- Sisamanngorneq 23. januaari
- Nuup Katersortarfiani
- Nal. 16.30-mit 18.30 tungaanut
Illoqarfiit pingaarnersaat pillugu periusissiaq ”Nuuk2035” atuarneqarsinnaavoq uani.
Illoqarfiit Pingaarnersaat pillugu periusissiaq Nuuk2035 Nuup Katersortarfiani saqqummiunneqarmat soqutigineqarluarpoq
Sisamanngorneq januaarip 23-anni Kommuneqarfik Sermersuumi innuttaasut qinikkallu Nuup Katersortarfiani illoqarfiit pingaarnersaat pillugu periusissiaq Nuuk2035 pillugu oqallisiginiarlugu annertunerusumillu paasisaqarfiginiarlugu naapeqatigiipput. Aaqqissuussineq, kissalaarfiusumik nuannersumillu ingerlanneqarpoq, soqutiginnittorpassuit takkupput taamaammallu paasinarsivoq, illoqarfiup siunissaa pillugu innuttaasut qanoq peqataarusussuseqartiginersut.
Borgmesteri Avaaraq Olsen takkussimasunut tamanut isumassarsiorfiusumik oqaaseqarluni tikilluaqqusivoq, erseqqissaatigalugulu innuttaasut, qinikkat inuussutissarsiuteqartullu Nuuk2035-mut tunngatillugu takorluukkat piviusunngortinnissaannut suleqatigiinneq qanoq pingaaruteqartiginersoq. Borgmesterip ilaatigut oqaatigaa:
“Nuuk2035 periusissiaannaanngilaq, taamaattorli tamatta siunissarput pillugu takorluugaavoq. Pappiaqqami allassimasunit annertunerujussuuvoq – iliuusissatut pilersaarusiaavoq, siunissamut takorluukkatta qanoq piviusunngortinneqarnissaannut anguniakkatsinnillu iluatsitsinissatsinnut immikkut ittunik periuseqarnernik imaqartoq.”
Nipilersornermik Ilinniarfimmi meeqqat erinarsoqatigiit erinnanik marlunnik atuillutik aallarniipput qiimmassaataalluarlutillu, aamma kingornatigut Hans-Henrik Suersaq Poulsen eqqumiitsuliortoq tamatigoortoq qilaatersorluni aliikkusersuivoq, isersimasuniillu nuannarineqarluarluni.
Peqataasut saqqummersitaq takuniarsinnaavaat, tassani kommunimi qinikkat pisortallu apeqquteqartoqarnissaanut akissuteqariaannaallutik piareersimapput, periusissiarlu pillugu oqaloqatigineqariaannaallutik. Ualeq oqaloqatigiilluarfiuvoq innuttaasuniillu nuannersunik siunnerfilinnillu utertitsiffiulluni.
Nuuk 2035-p saqqummiunneqarneranut atatillugu aamma inuussutissarsiuteqartut kulturimillu suliaqartut siunnerfilimmik ataatsimeeqatigineqartarput, taakkunanilu peqataasut susassaqarfiannut periusissiamit sunniutissat eqqartorsinnaallugit aamma siunissami Nuup nukittuumik illoqarfiillu pingaarnersaatut akuutitsiffiusumik ineriartornissaanut namminneq ilanngukkusutatik saqqummiussorlugit.
Aaqqissuussineq taanna Nuup Kalaallit Nunaanni illoqarfiit pingaarnersaatut ineriartortinneqarnissaanut qinikkat innuttaasunik akuutitsinissamik iliuuserisaasa ilagivaat. Periusissiaq Nuuk2035 piujuartitsinermik, illoqarfiup ineriartortinnissaanik aamma illoqarfimmi innuttaasut tamarmik inuunerannik pitsaassuseqartitsinissamik qitiutitsisuuvoq.
Kommuneqarfik Sermersooq kajumillutik peqataajartortunut tamanut qujassuteqarpoq aamma iliuusissat amerlasuut pissanganartut oqaloqatigiittarnissallu qilanaaralugit, peqatigiilluta nukittuumik ataqatigiissagaanerusumillu illoqarfiit pingaarnersaat pilersissinnaaniassagatsigu.
