Atermik unammisitsineq - Nuummi atuarfik nutaaq ulluuneranilu paaqqinnittarfik atsikkit
Maanna Nuummi atuarfiup nutaap ulluuneranilu paaqqinnittarfiup atissaanik siunnersuuteqarnissannut periarfissaqalerputit.
Nuup qeqqani nutaamik atuarfiliortoqarluni meeqqeriviliortoqarpoq. Atuarfimmik meeqqerivimmillu sanaartornermi pitsaassuseq illuliortaaserlu annertuumik pingaartinneqassasut takorloorneqarpoq, taakku ukiorpassuarni tulliuttuni ilikkagaqarfiulluartumik avatangiiseqartitsillutik ikorfartuutaalluarumaartut. Atuarfik 2024-mi naammassineqassaaq, meeqqerivillu 2023-mi.
Sanaartukkat illoqarfitsinni meeqqat inuusuttullu naleqquttumik atugassaqartissavaat ataqatigiissinneqassappullu meeraaqqerivimmiit atuartunut angajullernut. Illuliortaatsip taamatullu illup aaqqissorneqarnera taakkuussapput atuartut ataasiakkaat pisariaqartitaat tunngavigalugit pilersinneqartussat atuartumullu ilinniarusussuseqalersitsisussat. Atuarfimmi aamma ulluunerani paaqqinnittarfimmi pinnguarusussuseqarnissamut aalanissamullu piumassuseqarnissaq pilersissallugu pingaartinneqarpoq.
Atuarfiup atortui, soorlu: multihali, inersuaq atuartitsivik, café, qitittarfik il.il. illoqarfiup innuttaanut, peqatigiiffinnut kiisalu kulturikkut pisimasoqartitsinernut aaqqissuussinernullu ammatinneqarnissaat anguniarneqarpoq.
Atuarfiliorneq illoqarfiup atuarfiinut marluusunut, Atuarfik Ukaliusaq (USK) aamma Atuarfik Samuel Kleinschmidt (ASK) taartitut sananeqarpoq.
Atuarfik aamma ulluunerani paaqqinnittarfik nutaaq pillugit paasisaqarnerusinnaavutit nittartakkamut uunga iserlutit: Nuummi atuarfik meeqqerivillu nutaat – Kommuneqarfik Sermersooq
Ungasinngitsukkut illut taakkua marluk naammassineqassapput, qanorli ateqartinneqassappat? Innuttaasutut siunnersuuteqarsinnaavutit immaqalu iluatsitsillutit ilinnut ilaqutannullu imaluunniit ilinnut atuaqatinnullu filmeriarnissamut billetsinnallutik. Nuup avataani najugallit siunnersuuteqartut assingusumik akissarsiassaqartinneqassapput najugarisaminni atorsinnaasaminnik.
Matumani Nuummi atuarfiup nutaap meeqqeriviullu atissaannik toqqaaniarneq aallartinneqassaaq innuttaasunik peqataatitsinikkut, tamannalu maajimi aallartinneqassaaq aggustimilu naammassineqarluni, kingornalu politikkikkut ataatsimiititap, Meeqqanut Atuarfeqarnermullu, isummerfigissavaa aqqit sorliit ajugaasuunersut.
Sukkut siunnersuuteqarsinnaavunga?
Uani Kommuneqarfiga-mi digitalikkut atuarfimmut taamatullu meeqqerivimmut atermik siunnersuuteqarsinnaavutit, ilitsersuutitaa maliinnassavat. Nammineerlutit siunnersuuteqarusukkuit taava "taasivissanik" Atuarfik Ukaliusami (USK), Atuarfik Samuel Kleinschmidtimi (ASK), AKO Illu-mi aamma AKO Narsarmiutaq-mi kiisalu Innuttaasunut Kiffartuussivimmi nakkartitsivissaqarpoq.
Siunnersuutigineqartut ulloq 8. juuni 2023-mi katersorneqassapput.
Aternut piumasaqaat:
Suliamik ingerlatsinissat
Aternik unammisitsineq
Kommuneqarfiga-mi aternik unammisitsineq aamma karsit taasivissat, taakkunani innuttaasut tamarmik digitalimik aamma namminneq siunnersuuteqarsinnaapput.
Atuarfittaassap taaguutissaanik meeqqerivissallu taaguutissaanik siunnersuuteqarniarlutit apersuinermi immersuiffissamut siunnersuutitit matuma ataani allassavatit imaluunniit taasinermi karsinut nakkartitsivimmut ornigullutit nakkartikkiartornerlugit. Apeqqutissaqarutta imaluunniit siunnersuutigisat ajugaatinneqarsimappat, attaveqarfigineqarnissannut paasissutissat pisariaqartippavut.
Karsinik taasivissanik Atuarfik Ukaliusami (USK), Atuarfik Samuel Kleinschmidtimi (ASK), AKO Illu-mi aamma AKO Narsarmiutaq-mi kiisalu Innuttaasunik Kiffartuussivimmi inissiisoqassaaq.
Atermik unammisitsinermi ajugaasoq tassaassaaq siunnersuuteqartup taaguutissamik siunnersuutaanik aggustip qaammataani Meeqqanut Atuarfeqarnermullu Ataatsimiititami politikkikkut taasinermi ajugaatinneqartoq. Siunnersuuteqartut arlallit siunnersuutaat assigiissappata assigiit akornanni makitsisoqassaaq.
Piffissaliussaq 8. juuni