Paamiut eqqaani illuaraqarfiit

Sanarfinermut Avatangiisinullu Ingerlatsiviup Kommunimut pilersaarut 2036-mut atatillugu Paamiut eqqaanni nunaannaap qanoq atorneqartarneranik misissuinermi innuttaasut isumaat tusarusuppaa.

Apeqqutit atorlugit misissuinitsinni nunaannarmi illuaqqanik nunaannaallu takornarialerisunit atorneqaleratarsinnaanera sillimaffigalugu innuttaasut soqutigisaat pillugit erseqqinnerusumik paasisaqarusuppugut. Sumiiffimmut aalajangersakkat nutaat tassaassapput piujuartitsisumik piffissamut sivisuumut pilersaarusiornermut qulakkeerutaasussat, nunaannarmi kulturimik pinngortitamillu kingornussat, asiartarfittut pingaartitat aammalu assigiinngitsunik illuaraliortoqarnissaanut periarfissat eqqarsaatigalugit.

Taamaattumik misissuinerup immikkoortuani siullermi innuttaasut ataasiakkaat Paamiut eqqaanni asiartarfinnik qanoq atuisarnerisa misissornissaa aammalu innuttaasut illuaqqat qanoq angissuseqarnissaat qanorlu imminnut ungasitsiginissaat pillugu isumaat tusarusupparput. Misissuinermi peqataatitsinerup immikkoortuata aappaanni Paamiut eqqaanni illuaraqarfiit sumiissinnaanerannik tikkuussisinnaavusi.

Innuttaasut tamaasa kajumissaarusuppavut qanorluunniit Paamiut eqqaanni atuisuugunik, illuaqqamik pigisaqarunik, sunngiffimmi pinialuttartuugunik imaluunniit inuilaamut pisukkiartartuugunik asimiinneq qanoq isumaqarfiginerlugu misissuinermut peqataaqqullugit.