Hans Egedemut eqqaassutissap, qaqqallu siunissaa

Taasinermut tunuliaqutaasoq

Hans Egedemut eqqaassutissaq, 1922-mi napparneqarpoq, inuit namminneq katersereernerisa kingorna. Uleersinermi, illoqarfiup innutaanut tunniunneqarpoq. 1953-ip tungaanut, KGH eqqaassutissamut akisussaasuusimavoq, taassumallu kingorna akisussaaffik Nuup Kommunianiilerluni.

Inuiattut ullorsiornermi, Hans Egedemut eqqaassutissaq qalipaammik serlersaarneqarfigineqarmalli, eqqaassutissap siunissaa oqallisigineqalerpoq. Tamanna tunuliaqutigalugu, Kommuneqarfik Sermersuumi innuttaasut pisortatigoortumik taasitinneqassapput.

Suliaq tamanna juulip pingajuanniit septembarip aallaqqaataata 2020-p tungaanut ingerlanneqassaaq.

03.07 – 10.08.2020 ingerlanneqassaaq, ´Tidslinje´-milu malinnaavigisinnaavat.

Nuummi Hans Egedemut eqqaassutissaq qanoq pineqassava? 

Taasinermut peqataagit, isummallu tusartillugu.

Taasinissamut periarfissat marluupput, ataaserlu toqqarsinnaavat:

• Hans Egedemut eqqaassutissaq inissisimaffimminiiginnassaaq
• Hans Egedemut eqqaassutissaq nuunneqassaaq.

Hans Egedemut qqaassutissaq ataannassanersoq, allamulluunniit nuunneqassanersoq kissaatigigukku, kaammattorusuppatsigit isummat tunngavilersussagit, sooq taama isumaqarnerlutit. Aamma siunnersuuteqarsinnaavutit, sumut nuunneqassanersoq.

Nuunneqarnissaanut taasisut amerlanerussuteqassagaluarpata, paasineqarusuppoq Hans Egedemut eqqaassutissap sumut nuunneqarnissaa kissaatigineqarnersoq, qaqqarlu napaffiginikuusaa qanoq atussaneripput. Aappassaattut, uunga isummeqqullutit kaammattorneqarputit:

• Hans Egedemut eqqaassutissap sumiiffissaa nutaaq
• Hans Egedemut eqqaassutissamut taarsiullugu, suna qaqqap qaavaniissava.

Isummat aamma allatut tusartissinnaavat

Kommuneqarfigami taasinerpit saniatigut, 20.07.2020 ataatsimiinnermi isummat tusartissinnaavat, aggustimilu titartaanermi unammisoqassalluni. (Events ataani annertunerusumik takusaqarsinnaavutit).

Taassumap saniatigut, Kommuneqarfik Sermersuumut allakkanik nassiussisinnaavutit, taasinerit qaqqallu sumut atorneqanissaanut siunnersuuteqarlutit. Aammattaaq Hans Egedemut eqqaassutissaq sumut inissinneqassanersoq. Allakkat immersorneqarsinnaasoq uani takuuk

Nuummiuninngaanniit siunnersuutit tamarmik, qarasaasiat aqqutigalugit, allakkatigullu nassiunneqartut, katersorneqassapput, taakkulu Aningaasaqarnermut Inuussutissarsionermullu Ataatsimiititamut 20.08.2020 saqqummiunneqassallutik.

Septembarip aallaqqaataanni 2020-mi Kommunalbestyrelsip ataatsimiinnerani inaarutaasumik aalajangiisoqarlunilu tamanut saqqummiuussisoqassaaq.

Qujanaq isummannik avitseqatigigatsigut!

Sept - 2020

Hans Egedep eqqaassutissaata sumiiffissaa pillugu taasineq marlunngornermi septembarip ulluisa aallaqqaataanni Kommunalbestyrelsimut ilisimatitsissutigineqarpoq. Innuttaasut 1.649-t taaseqataapput, taakkunanngalu 62 %-ii isumaqarput eqqaassutissaq nikisinneqarani tassaniiginnassasoq 38 %-iilu eqqaassutissap nuunneqarnissaanut isummerlutik.

Tamatuma saniatigut taaseqataasut akornanni arlaqarpusi akissuteqarnissigut tunngavilersuillusi, oqaaseqaateqarlusi isummersoqataallusilu – tamakku tamaasa annguppasi Kommuneqarfiga aqqutigalugu taavalu Katuami oqaloqatigiinnertalimmik ataatsimeeqatigiinnikkut.

Ammasumik taasititsinerup inerneri tunngavigalugit eqqaassutissap inissisimaffia eqqarsaatigalugu Kommunalbestyrelsimit iliuuseqarfigeqqinniarnagu aalajangiunneqarpoq, kisianni imaanngilaq oqaloqatigiinneq tamaanga killeqartoq.

Hans Egedep eqqaassutissaa ataatsimut oqaluttuarisaanitsinnut assigiinngitsunik isiginnittaaseqarnermik takutitsivoq – isiginnittaatsillu tamarmik nunasiaataanermut nunasiaataajunnaarnermullu tamat oqallinneranni inissaqartinneqarlutik. Maanna nuna tamakkerlugu kinaassuserput oqaluttuarisaanerpullu pillugit oqallinneq eqqarsaatigalugu oqaluuserisassanngortitsinissaq ingerlateqqipparput.

Kajumissuseqarnissinnut siunnersuutissinnullu qujavugut.