Nunaannarmut pilersaarut 2-3 Nuup eqqaa

Pilersaarutitut sumiiffiit killilersorlugit toqqakkat, siunissami sunngiffimmi illuaqqanik, takornarialerisunit takornarianut tammaarfinnik, paaqqinnittarfiit illuaraataannik il.il. sanaartorfiusinnaasussat. Siunnersuummi ilanngullugit nunaannarmi sanaartukkat qanoq ittut akuerisat tamarmik allaaserineqarputtaaq.

Tammaarfiit eqqarsaatigalugit pineqartut tassaapput takornarianit atorneqartussat, piffissaq tamaat atugassatut napparneqartut, immaqalu ukiut tamaasa atoqqinneqartarsinnaasut. Maannakkut kommunimut pilersaarummut tapiliussatut siunnersuummi, inuilaarsuarmi piffissami aalajangersimasumi atortunik inaaliinissamut, tupeqarfiliornissamut aammalu utaqqiisaasumik oqquiffissaliornissamut periarfissiisoqassaaq.

Sumiiffimmut aalajangersakkat nutaat tassaassapput piujuartitsisumik piffissamut sivisuumut pilersaarusiornermut qulakkeerutaasussat, nunaannarmi kulturimik pinngortitamillu kingornussat, asiartarfittut pingaartitat aammalu assigiinngitsunik illuaraliortoqarnissaanut periarfissat eqqarsaatigalugit.

Apeqqutit atorlugit misissuinitsinni nunaannarmi illuaqqanik nunaannaallu takornarialerisunit atorneqaleratarsinnaanera sillimaffigalugu innuttaasut soqutigisaat pillugit erseqqinnerusumik paasisaqarusuppugut. Innuttaasut tamaasa kajumissaarusuppavut qanorluunniit Nuup kangerluanik atuisuugunik, illuaqqamik pigisaqarunik, sunngiffimmi pinialuttartuugunik imaluunniit inuilaamut pisukkiartortartuugunik asimiinneq qanoq isumaqarfiginerlugu misissuinermut peqataaqqullugit.