Ittoqqortoormiit 2036

Ittoqqortoormiit illoqarfiata ukiuni aggersuni ineriartortinnissaanut siunnerfileeqataasussaq illoqarfimmut periusissaq nutaaq Kommuneqarfik Sermersuumiit suliarineqaleruttorpoq.

Tamatumunnga atatillugu innuttaasunik najukkamilu sulisunik ilaatigut septembarimi borgmesterip tikeraarneranut atatillugu oqaloqateqarlualereerpugut. Siunnersuutigineqartut naleqarluarput suleriaqqinnissamullu tunngavissiilluarlutik.

Maanna suli allanik tusaqqikkusuppugut. Ullumikkut Ittoqqortoormiini inuunissi qanoq misiginerissi tusarusupparput – aamma illoqarfiup siunissami ineriartortinnissaanut qanoq kissaateqarnersusi isumassarsiaqarnersusilu.

Taamaattumik innuttaasut tamaasa kaammattussavagut apersuinermi immersugassamut peqataaqqullugit. Tassani apeqqutit sukumiisut akissuteqarfiginissaannut taavalu nammineq eqqarsaatisi siunnersuutisilu allattornissaannut periarfissaqarpusi.

Apersuinermi immersugassaq pappialanngorlugu atorusunnerugukku, Innuttaasunik Kiffartuussivimmut aaneqarlunilu tunniunneqarsinnaavoq.