Kommuneqarfik Sermersuumi ulluunerani paaqqinnittarfiit pitsaanerusut qanoq iliorluni pilersinneqarsinnaappat?
Ulluunerani paaqqinnittarfiit suliassaqarfiupput, Kommuneqarfik Sermersuumi pingaaruteqarluinnartutut inissisimasut. Kommunimiit meeqqat ulluinnarni toqqissisimanissaat, aammalu sammisassanik, meeqqat toqqissisimanerinut ineriartornerinullu tapertaasunik qulakkeeriffigineqarnissaat kissaatigineqarpoq. Tamatuma peqatigisaanik aamma sulisut suminerminni avatangiisaasa pitsaanerulernissaat annertuumik aallunneqarpoq. Taamaattumik ingerlatsivik suliniutinik nutaanik paaqqinniffiit unammilligassaannut naaperiaaffiusinnaasunik suliaqartuarpoq. Pingaartumik immikkoortut pingaarnerit sisamat, ulluunerani paaqqinnittarfeqarnermut siuarsaaqataasinnaasut aallunneqarput:
1. Sulisussarsiorneq sulisunillu pigisaqaannarniartarneq
2. Angajoqqaanik suleqateqarneq ikaarsaariarfiillu pitsaasut
3. Meeqqat toqqissisimanissaasalu aallunneqarneri
4. Paaqqinnittarfinni avatangiisitigut sinaakkutissat
Suliassaqarfinni sisamaasuni taakkunani suliniutinik arlalinnik aallartitsisoqareerpoq. Kisiannili ingerlatsivimmi ukiup tullianut missingersuusiortoqalerpat isumassarsiat pitsaanerpaat tamarmik ilaatinneqarnissaat qulakkeerniarlugu, suliniutissanut aalajangersimasunut, kommunimit aallartinneqarsinnaasunut siunnersuutissinnik tusagaqarusuppugut. Suliniuteqarfissat aalajangersimanerusut sisamat iluanni immikkut kissaatigineqarput:
a) Sulisussanik nutaanik pissarsiorneq
b) Angajoqqaanik suleqateqarneq nukittooq
c) Meeqqat ulluunerani paaqqinnittarfinniittalernerminni sungiusartarnerat
d) Assersuutigalugu angerlarsimaffimmiit meeraaqqerivimmut aamma meeraaqqerivimmiit meeqqerivimmut ikaarsaartarnerit
Suliassaqarfinnut sisamaasunut taakkununnga isumassarsiassinnik siunnersuutissinnillu ingerlatsivik kissaateqarpoq. Suliassaqarfiit sisamaasut taakku iluanni suliniutinik ingerlatsisoqareerpoq, allanik aallarnisaasoqarpoq aammalu suli ilaat piareersarneqarlutik ulluunerani paaqqinnittarnermut neqeroorutinut pilersaarut 2022-2030-p ilaatut aallartinneqarnissaat naatsorsuutigineqarpoq. Isumassarsiaminnik saqqummiusserusuttut isumassarsiuerusuttullu tamassi qinnuigissavatsigit, isumassarsiassinnik nutaanik saqqummiussinnginnissinni suliassaqarfinni sisamaasuni taakkunani suliniutit pioreersut pilersaarutaasullu pillugit nassuiaatit matuma kingulianiittut atuaqqullugit.
Malugineqassaaq, Namminersorlutik Oqartussat sulisunut isumaqatiginninniartarmata. Taamaattumik Kommuneqarfik Sermersooq ulluunerani paaqqinnittarfinni sulisut qaffasinnerusunik akissarsiaqarnissaannut neqeroorfigissallugit periarfissaqanngilaq.
Siunnersuutisi perorsaanermut sulisullu suliatigut piginnaasaannut, imaluunniit paaqqinnittarfimmi avatangiisinut sinaakkusiussanut tunngassanngillat. Siunnersuutisi aalajangersimasunut tunngasuussappat, ajornanngippallu kommunimi ulluunerani paaqqinnittarfinni tamani aallartinneqarsinnaassapput. Inunnut saassussinissaq inerteqqutaavoq, aammalu ileqqorissaarnissaq inassutigineqarpoq.
Suliamik ingerlatsinissat
Ulluunerani neqeroorutinut immikkoortumi pilersaarut
Tunniussassinnut qujanarujussuaq Meeqqanut Atuarfeqarnermullu Ingerlatsivimmit tunniussassi ilaat ulluunerani neqeroorutinut immikkoortumi pilersaarummut ilanngussinnaanersut misissorneqarput. Suliniutit ilaat aallartinneqareerput (suliffissaaleqisunik sulilertitsinerit aamma angajoqqaanut nittartagaq), ilaalu kommunip susassaqarfiata pisinnaatitaaffiisaluunniit avataaniillutik (ass. perorsaasut akissarsiaqarnerulersinneqarnissaat, tassa Namminersorlutik Oqartussat tassaammata isumaqatiginninniartartut.
Kommunalbestyrelsip februaarip ulluisa 13-ianni ulluunerani neqeroorutinut pilersaarut akuersissutigaa. Ulluunerani neqerooruteqartarnermut pilersaarut kommunip siunissami ulluunerani neqeroorutinut nukittorsaaffiusunik suliniuteqarnissaanut siunnerfiliissaaq.
Kommunip nittartagaani ulluunerani neqeroorutinut pilersaarut takusinnaavarsi: https://sermersooq.gl/kl/2023/03/immikkoortumut-pilersaarut-nutaaq-ulluunerani-neqeroorutinut-nukittorsaaviussaaq/#/
Immikkoortumi pilersaarummi atorfinitsitsinernut, attassinissamut, ilinniagaqarnermut aamma sulisunik piginnaanngorsaanernik, tassunga ilanngullugit napparsimalluni sulinngitsoortartunut suliniutinik aamma Ininut pisariaqartitsineq naapertorlugu ikiuuttartut (flyverpædagog) pillugit aaqqiissummik suliniutinik imaqarpoq. Saniatigut meeqqat nuuttarneri pitsaasut pillugit kiisalu pitsaasumik angajoqqaanik suleqateqartarneq qanoq qulakkeerneqarsinnaanersoq pillugu atuagaqarsinnaavutit.