Innuttaasunit siunnersuut
Innuttaasut siunnersuutaat suua?
Kommuneqarfik Sermersuumi innuttaasutut innuttaasoqatinnit tapersersorneqaruit kommunalbestyrelsimut siunnersuuteqarsinnaatitaavutit. Kommuneqarfik Sermersuup susassaqarfianut tunngasumik sumilluunniit siunnersuuteqarsinnaatitaavutit. Siunnersuut sanaartornermut, allannguinermut, pitsannguinermut aamma Kommuneqarfik Sermersuumi innuttaasut inuunerannut pitsannguutaasinnaasunut imaluunniit politikerinit eqqumaffigineqartariaqartunut tunngasinnaavoq.
Siunnersuut kommunimi innuttaasunut pingaaruteqarnersoq qulakkeerniarlugu allaniit aamma tapersersorneqartariaqarpoq. Nuummit taasinerit 250-it immikkoortunilu allanit taasinerit 50-it ullut 90-it iluanni piumasaqaataapput, siunnersuut kommunalbestyrelsimut saqqummiunneqassappat. Siunnersuutit ilaatigut Facebook aqqutigalugu Kommuneqarfiga-mi siammartersinnaavat, tassuunalu tapersersortissarsiorlutit. Siunnersuutit 250-inik imaluunniit ullut 90-it ingerlaneranni 50-inik taaneqarsimappat ataatsimiititami susassaqartumi kommunalbestyrelsimiluunniit oqaluuserineqassaaq.
Qanoq aallartissavit?
Tapersersorneqarsinnaasumik siunnersuuteqassaguit pingaaruteqarpoq, piumasaqaatit atuuttut suunersut paasissallugit. Piumasaqaatit matuma kinguliini takusinnaavatit.
- Siunnersuut Kommuneqarfik Sermersuumi piginnaatitaaffiinut tunngasuussaaq.
- Siunnersuut arnanut, angutinut, ukiunut tunuliaqutinulluunniit immikkoortitsisuussanngilaq
- Siunnersuut paasissutissanik isertuunneqartariaqartunik inunnulluunniit ataasiakkaanut tunngasunik paasissutissanik imaqassanngilaq
- Siunnersuut kikkunnulluunniit soqutiginaateqassaaq ilinnuinnaq soqutiginartuunera pinnagu
- Siunnersuut allanut ajoqutaassanngilaq
- Kommunalbestyrelse siunnersuummik assingusumik siunnersuutivilluunniit assinganik suliaqareersimappat aalajangiussaqareersimappalluunniit, siunnersuutit kommunalbestyrelsimi oqaluuserineqarsinnaanavianngilaq.
Siunnersuutivit ullut 90-it iluanni taasinerit 250-it anguppagit suna naatsorsuutigissaviuk?
Siunnersuutit ullut 90-it ingerlaneranni 250-init taaneqarsimappat Kommuneqarfik Sermersuumi sulisumit attavigineqarumaarputit, taassuma siunnersuutivit kommunalbestyrelsimut saqqummiussaliarinissaa piareersassavaa.
Suliamik saqqummiussaliaq ataatsimiititap imaluunniit kommunalbestyrelsip ataatsimiinnissaani qaninnermi oqaluuserisassaanut ilanngunneqassaaq. Ataatsimiinnerup kingorna siunnersuutivit politikkikkut suliarineqarneranut tunngasumik allakkatigut nalunaarfigineqassaatit.
Piffissaliussap iluani taasinerit 250-it angunngikkaanni, siunnersuutit sussappat?
Taamaattoqartarpoq, isumaalunnissamulli pissutissaqartoqanngilaq. Siunnersuutit platformimiiginnassaaq. Siunnersuutit nammineq allanngortinneqassaaq 'Qaangiuppoq'. Taamaattumillu taasisinnaaneq atorsinnaajunnaassalluni. Kissaatigigukku qaqugukkulluunniit nammineq siunnersuutit piiarsinnaavat